Şirvan Apellyasiya Məhkəməsi Biləsuvarda polisə müqavimət göstərməkdə təqsirləndirilən İlqar Rəsulovla bağlı qərar elan edib.
Hakim Rafiq Cəfərovun sədrliyi ilə keçirilən prosesdə təqsirləndirilən şəxsin apellyasiya şikayəti təmin edilməyib.
Qərara əsasən, birinci instansiya məhkəməsinin çıxardığı hökm qüvvədə saxlanılıb.
Qeyd edək ki, hadisə 2020-ci ilin dekabrın 19-da qeydə alınıb.
Belə ki, İ.Rəsulov Biləsuvar Rayon Polis Şöbəsinin (RPŞ) təhqiqat bölməsinin təhqiqatçısı Vüsal Adışova qarşı zor tətbiq etməklə müqavimət göstərib.
Daha sonra o, saxlanılıb.
İ.Rəsulovun üzərinə baxış keçirilən zaman əynindəki gödəkçənin sağ iç cibindən bir ədəd şəffaf rəngli sellofana bükülmüş təmiz çəkisi 10,253 qram olan psixotrop maddə-metamfetamin aşkar edilərək götürülüb.
İstintaq orqanı tərəfindən onun barəsində Cinayət Məcəlləsinin 315-ci (hakimiyyət nümayəndəsinə qarşı müqavimət göstərmə və ya zor tətbiq etmə) və 234.1-ci (narkotik vasitələrinin qanunsuz dövriyyəsi) maddələri ilə ittiham irəli sürülüb.
Biləsuvar Rayon Məhkəməsinin hökmü ilə İ.Rəsulov 5 il müddətinə azadlıqdan məhrum edilib. Hökmdən narazı qalan məhkum apellyasiya şikayəti verib.